ماذا عن المستقبل

طرحت اشاعة موت الرئيس منذ عام تقريبا سؤالا خطيرا جدا
لم أفلح فى ايجاد اجابة له
لما حسنى يموت
ايه هو مستقبل النظام السياسى فى البلد
كل دول العالم لديها تصور حول المستقبل السياسى لها
معظمها لديها نائب
لو مات الرئيس فجأة يحل محله
و بعضها لديه نظام وزارى
لو مات رئيس الوزراء يتولى من يختاره الحزب الحاكم
و قلة ما زالت تعتمد على نظام العصور الوسطى
لو مات الملك يحكم ولى عهده

عموما لو حسنى مات فجأة
مين هيمسك البلد

طبعا المستقبل بيد الله
و لكنى أتكلم عن الاحتمالات
و عن قياس للمستقبل و تخيله من وجهة نظرنا

السيناريوهات المطروحة هى



1 جيمى
الفتى الذهبى
ابن الريس
صاحب البيت
ارتفاع اسهمه فى الأعوام الأخيرة
و صعوده و فكره بسرعة الصاروخ يساند هذا الرأى
كما أنه الشاب بتاع أمريكا
يعنى مش هيلاقى صعوبات

و ان كنت غير مقتنع لسبب بسيط
مصدر قوة جمال هو حسنى
فعندما يموت حسنى
ماذا سيكون موقف جمال و وزنه؟؟!!



2 أحمد عز
قوة المال
الرجل الذى يعمل و يوطد مركزه دائما
أين كان منذ 10 سنوات
لا أعلم
أين هو الأن
انظروا بأنفسكم
قوته أنه صديق لأمريكا و اسرائيل مثل جيمى
و لكن المال سيدوم على عكس قوة جيمى المستمدة من الرئيس



3 الحرس القديم
الشباب الحلو
كمال الشاذلى
صفوت
زكريا
سرور
الناس دى
مين يقدر ينساهم
هل سيكون لهم دور
بالتأكيد
و لكن هل سيكون أحدهم
هذا هو السؤال



4 المؤسسة العسكرية
الاحتمال الأكبر فى رأيى
طنطاوى أو سليمان
انسوا كل الهراء حول أن النظام نظام مدنى
النظام نظام عسكرى
مع غياب القوة السياسية و الجماهيرية للحزب الحاكم
لا مفر من الارتكان للقوة العسكرية
و الاسم الأبرز فى رأيى عمر سليمان و ليس طنطاوى
لصلاته مع أمريكا و اسرائيل
و أن المهام المعلنة التى يكلفه بها حسنى
هى أقرب فى الواقع لمهام نائب رئيس الجمهورية فى الدول اللى بجد




5 الاخوان
السبب الوحيد لوجود اسمهم
هو أنهم القوة الوحيدة الحقيقية الموجودة على الساحة السياسية
و كل من له راى أخر أو يريد طرح اسم أخر أرجو منه أن يمرر كلمات الجملة على الاسم الذى طرحه
و ستجد أن كلمة أو كلمتين لا تنطبقان عليه
المشكلة هى أنه مين قال ان الدولة فى مصر بتمشى بطريقة منطقية
و مين قال ان الجيش و الحرس القديم او الجديد هيسمحوا بحدوث هذا
ناهيك طبعا عن تدخل أمريكا و اسرائيل بحجة حماية النصارى
هذا السيناريو مستبعد تماما فى رأيى



6 الحرس الجديد
وزراء المجموعة الاقتصادية الذين فرضتهم أمريكا فرضا على مصر
مين هيراعى مصالح أمريكا زيهم
محدش طبعا
و لكن ليس لهم أى وزن عندما نتكلم عن السياسة



7 مصر دى بلد العجائب
لا تنطبق عليه قواعد المنطق الموجودة على ظهر البسيطة
تقدروا تنسوا كل كلامى ده
لأن اللى هيحصل حاجة تانية خالص بالتاكيد
مينفعش الأمور تمشى فى مصر بمنطقية